Bibeanna

Foilsíodh an leabhar seo ar dtúis sa bhliain 2007, agus tá sé ath-fhoilsithe ag Mercier Press i mbliana le clúdach cruaidh, rud a chur na scéalta agus an bailiúchán seo ós mo chomhair arís. Bhíos ró-óg ag an am chun an tábhacht a bhain leis an sraith teilifíse leis an dteideal chéanna a thuiscint, sraith a bhí le feiscint ar theilifísí na tíre i 2007. Is iontach an rud é gur bheartaigh an t-eagarthóir Brenda Ní Shúilleabháin ar an leabhar seo a bheith mar thionlacan leis na cláracha san, agus go bhfuil sé ós comhair an tsaoil fhódlaigh arís leis an ath-fhoilsiúchán seo.

Tá stair na tíre seo ar eolas agam, tuigim go raibh an saol níos deacra fadó, go raibh an t-airgead gann, go raibh cosc ar mhná a bheith ag múineadh agus iad pósta, go ndeineadh cleamhnais do dhaoine agus mar sin de, ach tá ana dhifríocht ann idir na rudaí san a léamh agus scéalta pearsanta na ndaoine a fháil agus iad ag plé na n-ábhar seo. An rud a sheasann amach i rith an bhailiúcháin seo ná neart na mban agus an meon dearfach a bhí acu ar fad.

Tá sé deacair a thuiscint sa lá atá inniu ann go raibh cosc ar ár máithreacha críonna in ana chuid slite, toisc go bhfuil an oiread saoirse ag mo ghlúinse anois. ‘An uair sin, ní bheifeá ag cuimhneamh puínn cad a dhéanfá nuair a bheifeá mór. Bhí an saol saghas leagtha síos duit ar chuma éigin’. ‘Chaith daoine féachaint i ndiaidh a gcuid féin, pé rud a bhí uathu go pearsanta’. ‘Ormsa a thit sé mar sin, aire a thabhairt d’ár dtuismitheoirí.’ Sin samplaí ó thriúr éagsúil ar mar a bhí acu fhéin.

Tá ‘Bibeanna’ curtha in eagar ag Brenda Ní Shúilleabháin agus foilsithe ag Mercier Press. Tá leagan Béarla de gach scéal ar fáil sa bhailiúchán seo.

Tá ‘Bibeanna’ ar fáil sa Chaifé Liteartha sa Daingean agus i Siopa Leabhar an Daingin https://dinglebookshop.com/search?q=bibeanna

Edel Ní Loibhéad